ജിദ്ദ: സൗദി മുന്‍ വാര്‍ത്താവിതരണ മന്ത്രിയും ദല്ലാ അല്‍ ബറക വ്യവസായ ഗ്രൂപ്പിന്റെ വൈസ് ചെയര്‍മാനും ഇഖ്‌റാ ചാരിറ്റബ്ള്‍ ഫൗണ്ടേഷന്‍ സ്ഥാപകനുമായ മുഹമ്മദ് അബ്ദു യമാനി (72)അന്തരിച്ചു. ചൊവ്വാഴ്ച രാത്രിയായിരുന്നു അന്ത്യം. മസ്ജിദുല്‍ ഹറാമില്‍ ജനാസ നമസ്‌കാരത്തിനു ശേഷം ജന്നത്തുല്‍ മഅല്ലയില്‍ ഖബറടക്കി. മലയാളികളടക്കം നിരവധി പ്രമുഖര്‍ അന്ത്യകര്‍മങ്ങളില്‍ പങ്കെടുക്കാന്‍ എത്തിയിരുന്നു.
മക്കയില്‍ ജനിച്ച യമാനി അമേരിക്കയിലെ കോര്‍ണെല്‍ യൂനിവേഴ്‌സിറ്റിയില്‍നിന്ന് ജിയോളജിയില്‍ ഡോക്ടറേറ്റ് നേടി. സൗദിയിലെ നിരവധി സര്‍വകലാശാലകളില്‍ അധ്യാപകനായി ജോലി ചെയ്തിട്ടുണ്ട്. അഞ്ചുവര്‍ഷം സൗദി വാര്‍ത്താവിതരണമന്ത്രിയായി സേവനമനുഷ്ഠിച്ചു. ജിദ്ദ കിങ് അബ്ദുല്‍ അസീസ് യൂനിവേഴ്‌സിറ്റിയുടെ പ്രസിഡന്റായും പ്രവര്‍ത്തിച്ചിട്ടുണ്ട്. വിവിധ വിഷയങ്ങളില്‍ 35ലേറെ കൃതികള്‍ രചിച്ചിട്ടുണ്ട്.
No comments:
Post a Comment