നിയന്ത്രണം വിട്ട ട്രക്ക് ഹോട്ടലിലേക്ക് പാഞ്ഞുകയറി നാല് മരണം

Thursday, January 14, 2010
അബൂദബി: മുസഫക്ക് സമീപം ത്വാരിഫ്^അബൂദബി റോഡില്‍ ട്രക്ക് ഹോട്ടലിലേക്ക് പാഞ്ഞുകയറി നാലു പേര്‍ മരിച്ചു. 15 പേര്‍ക്ക് പരിക്കേറ്റു.
മരിച്ചവരില്‍ മൂന്നു പേര്‍ പാക് സ്വദേശികളാണ്. ഒരാളെ തിരിച്ചറിഞ്ഞിട്ടില്ല. ഇന്നലെ രാവിലെ ഒമ്പതരയോടെ ഹമീം റൌണ്ട് എബൌട്ടിനടുത്താണ് നാടിനെ നടുക്കിയ ദുരന്തം. ഹോട്ടലില്‍ ഭക്ഷണം കഴിക്കുന്നവരാണ് അപകടത്തില്‍പെട്ടത്. സൌദിയില്‍നിന്ന് ഇരുമ്പുകമ്പി കയറ്റിവന്ന ട്രക്ക് നിയന്ത്രണംവിട്ട് റോഡരികിലെ മുബാറക്ക് അല്‍ മന്‍സൂരി റസ്റ്റോറന്റിലേക്ക് ഇടിച്ചുകയറുകയായിരുന്നു.
പരിക്കേറ്റവരെ മഫ്റഖ്, ഖലീം ഹോസ്പിറ്റല്‍, സായിദ് ഹോസ്പിറ്റല്‍ എന്നിവിടങ്ങളില്‍ പ്രവേശിപ്പിച്ചു. ഹോട്ടല്‍ ജീവനക്കാരായ അഞ്ച് മലയാളികളും പാക്കിസ്ഥാനിയും ബംഗാളിയും പരിക്കൊന്നുമില്ലാതെ രക്ഷപ്പെട്ടു.
ട്രക്ക് ഡ്രൈവറുടെ അനാസ്ഥയാണ് അപകട കാരണമെന്ന് സംശയിക്കുന്നു. നിയന്ത്രണം വിട്ട വാഹനം കട പൂര്‍ണമായി തകര്‍ത്തു. ഇന്ത്യക്കാരനായ ട്രക്ക് ഡ്രൈവറുടെ പരിക്ക് അതീവ ഗുരുതരമാണ്.
മറ്റുള്ളവരുടെ പരിക്ക് ഗുരുതരമല്ലെന്ന് അബൂദബി പൊലീസ് ട്രാഫിക് ആന്റ് പെട്രോള്‍സ് മേധാവി കേണല്‍ ഹമദ് അദീല്‍ അശãംസി അറിയിച്ചു.